【八座MPV可以咁好飛】Volkswagen Transporter Kombi

:0:0

每隔兩、三年，又有朋友問：「究竟日本MPV好啲，定歐洲MPV好啲？」咁嘅問題，可以認真去答，亦可用好朋友身份，帶住開玩笑口吻反問，例如：「有個日本人女朋友好，抑或來自歐洲的『鬼妹』女朋友較好？」但凡選擇，其實邊度有「較好」或「邊個好啲」，至緊要合你心意，啱你需要。啱我，唔等於啱你嘛，老兄！

簡單數歐洲MPV優點，一定係底盤、車身、座椅結構特別紮實，無論係揸車，抑或做乘客都感受到。睇歐洲新車評審（EuroNCAP）嘅撞擊測試，幾乎全部喺猛烈撞擊測試之後，乘客都冇大幅度受傷。畢竟歐洲高速公路網廣、行車速度高，有必要具備良好「抵禦力」。今次試揸嘅Volkswagen Transporter Kombi，配2公升直四Turbo電油引擎，204匹，DSG波箱，但又有八個座位，咁嘅配搭，加上德國品牌，好耐冇見過喇。所以一路好想約嚟揸吓。

因工作關係，歷年喺歐洲試坐過唔同年份或車型嘅Transporter，有啲來自車廠公關部，有啲係租車公司嘅，有啲係旅行社用車。載客用嘅Transporter，內外都好踏實，冇花巧，座椅承托力好充裕，坐得耐腰同屁股都唔會攰，但座椅造型多年來都係好工整，規規矩矩，唔係日式高級MPV座椅嗰種：一見到就想放軟手腳成個人埃落去。我冇宗教信仰，但我一直堅信「非以役人，乃役於人」，坐車就坐車，唔係要人當你係大爺，處處體貼到畀，當正你至尊無上。所以座椅舒適度可以就夠了，我不是要做大爺。

不過，咁嘅態度唔等於要為Transporter Kombi一面倒說好。呢款車嘅最後排座椅嘅唔可以整排前後滑動，亦唔可以將個別座位獨立滑動。我喺試車休息時段諗咗好耐，點解Volkswagen會有咁嘅設計，我嘗試估計背後嘅設計理念，大致如下：首先，座椅配固定基座，穩陣紮實好多，事實上，你睇吓整個椅架，牢固地扣在地台金屬鞍座，兩者都粗壯結實。大吉利是講句，有乜大碰撞，九成九唔會成張椅飛出嚟。另外，確保車廂最後排有一個固定嘅置放行李空間。費事有啲大爺一上車就將長排櫈調校到最後，以為繑起對腳坐到最後就好爽，完全唔使理其他同行乘客，有幾多件行李或放幾多部單車。

嗱！諗就係咁諗，但呢啲所謂推斷都站唔住腳，欠缺紮實理據。例如，前後活動嘅座椅基座就等如唔安全？唔係呀化！呢樣嘢有咗幾十年喇喎，而家先至話唔夠安全？仲有，乘客區同行李區嘅分布比例，係好應該具彈性同機動性，否則，點能夠算得上多用途車（Multi Purpose Vehicle）呢？如果你覺得上述兩點批評與意見，都唔係咩大問題，咁唔代表你「變態」，亦唔係我袒護Volkswagen，而係你正正屬於Transporter Kombi嗰類目標買家同用家。

過得到呢個重要心理關口，會覺得Transporter Kombi其實好順眼，而且仲有相當多優點。例如佢副2公升直四Turbo引擎，馬力數字204匹/4200rpm-6000rpm，峰值扭力35.7kgm/1500rpm-4000rpm。0至100km/h加速8.7秒。我想講，媽！我好耐冇揸過啲力咁勁嘅歐洲MPV呀！即使係D Mode，中段動力發放好雄厚，S Mode更加係「跑味濃烈」。純粹本住「大細路」玩玩吓心態喺吐露港公路快揸咗一陣，真係揸得我偷笑。當然啦，試車時只有我和代理一位隨行人員，喺近乎「吉車」狀態實好力，但我相信，即使坐滿8個大人加行李，Transporter Kombi有肥厚低扭，同理想嘅短途爆發力。

睇見Transporter Kombi簡潔車廂，以為佢隔音麻麻，點知剛好相反，地台、車身、玻璃同車頂隔音都相當唔錯。波箱喺林錦公路落斜路段（由嘉道理農場到荃錦公路石崗起點），好主動拖波，既唔會「勒」得部車太死太慢，又做到低波行車同engine brake效果，三方面取得平衡，日本MPV要學嘢喇。操控方面，易揸，即使車長5.3米，冇壓力。輪胎尺碼235/55 R17，輪胎寬度合適，夠grip之餘亦算靈活。前輪循跡性幾好，尤其喺佈滿山水嘅荃錦公路（英雄亭段、軍營段）。

方才提過，Transporter Kombi老老實實，但車廂配備都算幾齊，雙電趟門、電動尾門、遙控尾門開關、三區自動恒溫冷氣、中排座椅上方有兩組獨立出風口、6喇叭Hi Fi（對應藍芽、USB及電話接駁），又有Rest Assist系統，你揸高速公路揸到瞌眼瞓，就提你休息。

整體嚟講，香港有得賣Transporter Kombi，我係開心嘅。但車價接近50萬，難免令人要諗多陣，更可能要諗好耐。畢竟，香港人眼中嘅MPV已有一套好清晰嘅配備，當中靈活多變嘅中、後排座椅更加係必須嘅。

Volkswagen Transporter Kombi規格售價：$499,000代理：Volkswagen Hong Kong www.vw.com.hk車型：五門八座體積：（長）5304mm x （闊）1904mm x （高）1990mm軸距：3400mm引擎形式：1984c.c. 直列4汽缸，缸內直噴，前置引擎馬力：204匹/4200rpm-6000rpm
扭力：35.7kgm/1500-4000rpm波箱：7前速雙離合器自動懸掛：（前）麥花臣支柱；（後）葉片彈簧0至100km/h加速：8.7秒
耗油：9.0L/100km 輪胎：（前、後）Dunlop SP Sport Maxx TT 235/55 ZR17 103W