10大 MK仔特徵，你係唔係Mk仔??

近日興起MK Pop，何謂MK，其實好抽象，總之有啲人就算一身潮服，仍然難洗濃厚MK味。萬一再配上大量MK行為同裝扮，絕對如魚得水相輔相成，即時變身最終型態嘅MK仔女完全體，橫行潮特旺中，稱霸砵蘭街！10大MK行為
1. 紋身

紋到全身同對手都係龍鳳虎嘅，有霸氣，但MK喜歡紋全黑圖案，而且最愛紋喺可以遮到嘅地方，例如背部、後頸、後腰、腳踭或小腿，屬又要威又要戴頭盔嘅佼佼者。

2. 烈火戰車

嘴邊濕透是淚，我深信影響MK文化最深嘅唔係o靚仔南鄭伊健，而係華弟劉德華。Fairing機車係MK鐵騎最愛，揸貨Van可能身不由己，但都盡量滲入MK元素，例如貼貼紙，貼日本漢字貼紙。
3. 奇妙配襯

MK仔其實好有風度，最鍾意幫女朋友拎手袋，而自己亦愛LV、Gucci等斜揹袋或腰袋，共通點有一個，就係個袋好細。

4. 睇社團漫畫

舊式香港漫畫中，以黑社會為題材嘅一直都有，以往鍾意用寫實風格配上明星臉相，最熱們係劉德華，仲有張耀揚。o依家市面仍然有古惑仔、火紅年代黑骨棠等漫畫，可以捲埋插喺後袋，好型。
5. 電話播歌

電話聽歌好正常，但唔戴耳機聽歌就太有型。除咗聽歌外，仲會打機，唔知點解要唔戴耳機又校到咁大聲，我諗因為MK仔崇尚自由，鍾意同人分享。另一個講法係唔理人感受，冇公德心。

6. 蒲機舖

自從網絡發達，人人屋企有電腦之後，已經好少去機舖。而香港大多數小型機舖o依家已經冇日本最新遊戲機，只有鬥地主、老虎機等大陸遊戲，其實手機同電腦都有得免費玩。
7. 每周打邊超過3日

「喂！今晚食雞煲！」、「今晚約咗食麻辣喎。」呢啲說話，好正常，冇問題。但如果換上：「喂！今晚打個邊先啦！」成件事即刻MK曬！MK仔女尤其喜歡打邊隊啤，明明打邊爐食緊飯都要猜兩板，不過講到最有代表性，都係檯上面一碟雞子。

8. 爆粗

o依家香港咁嘅環境，你提起振英，爆粗係人之常情。不過MK仔女係無論激唔激動都會加入大量粗口，例如每講一句之前都會無意識地加上XXXX四個字先。
9. 穿耳

正常穿耳戴耳環無問題，你係掟吉他愛與和平搖滾不死嘅Rock友，穿到成身窿亦都有風格。但MK仔就尤其鍾意穿耳之後戴上仿鑽石粒狀耳環，以為好型，其實已經係上兩個Lap嘅事情。

10. 染金毛

日本潮流年年都變，今年就興黑髮。不過MK潮流就天長地久，一直都係金髮，無論男女不論長短都要金毛。收成期係染髮後兩個月左右，頭頂生番黑色頭髮出嚟，為之最純正MK風味。


來源:http://ww.daliulian.net/

本篇	不想錯過? 請追蹤FB專頁!

喜歡這篇嗎？快分享吧！

前一頁 後一頁