荃灣街頭小食10蚊食到你..飽到嘔

:0:0

今時今日，拿著10元，買到多少街頭小食?1間位於荃灣的小食店告訴顧客，10元可買到3底雞蛋仔、或3碗豆腐花、或4件生煎包。「我哋開得呢個價，就係計過唔會蝕。」該間小食店負責人曾先生數年前由加拿大回流本港，驚覺香港街頭小食價格驚人，「小食本屬平價，但近年連小食都不斷加價，老實講，只要肯平賣，就會吸引更多顧客，薄利多銷。」曾先生近月才開舖，未知成敗，但求為港人帶來廉價小食。

物價通脹，店舖紛紛加價求存，曾先生的小食店卻成為逆市奇葩。一踏進荃灣某屋苑街市，就見到1間小食店，寫了「10元3底雞蛋仔、10元3碗豆腐花、10元4件生煎包、15元2盒章魚小丸子」，第一眼看來，令人不禁問:「係咪真係咁平﹖」
「真係咁平！有人覺得賣咁平會蝕，但我就睇準呢個商機，逆市而行。」曾先生與友人在今年5月開設港式小食店，以低價作主打，有人覺得此舉是「頂爛市」，但是曾先生卻希望「險中求勝」。
曾先生從加拿大回流本港，對港式街頭小食有情意結，卻連1次小食也買不下手，「依家出街，買幾款小食已經要30、40蚊，價錢同正餐差唔多，仲邊有人敢買！」念頭一轉，他想到以超低價賣小食，薄利多銷。「小食店嘅固定成本係人工、鋪租等。以雞蛋仔為例，賣1底、2底、3底，其中成本差別只係用多點粉漿，所以差別不大。我就以10蚊賣3底，人哋10蚊賣1底，如果我能夠吸引多幾倍客人，已經賺多過佢哋。」

的確，小食店非常旺場，在平日下午2、3時，每分鐘也有3至4名顧客，「最忙係下午6、7點放工時間，要5個人係鋪面先搞掂。最緊要係要快手，至能夠吸納更多客人。我呢度做街坊、熟客生意，唔少客人同我講，出面啲小食賣得太貴，唔捨得買，所以返嚟幫襯我。」

「亦有人懷疑我哋賣得咁平，驚係用咗平價劣質料，其實，我哋用足料，絕無欺場。」曾先生指出，雞蛋仔的麵粉是香港製造，而製造豆腐花及豆漿的黃豆，則來自加拿大，「最緊要係整出嚟好食。」

雖然有不少網民讚揚其小食店售價夠便宜，但亦有人指其雞蛋仔「用料少、全空心」。曾先生坦言，「聽過有人話我啲雞蛋仔空心薄皮，我相信係因為有時太趕、做得太快所致，現已盡量改善。」