大隻男狂摷女人底褲

:0:0

家陣啲港女硬係鍾意男人幫佢買嘢，同爆哥行埋嘅女友都知，要爆哥買名牌手袋肯定冇機會，但上星期一個女友竟然拉埋爆哥陪佢買底衫褲，嗯，斷估唔會屈爆哥送底褲咁高招啩？好，入去睇吓，點知入到女人濕平至愛嘅「 Sixty Eight」，爆哥覺得好鬼尷尬，都係女人行來行去，仲有人去試身，見到條麻甩佬坐喺度牛咁眼睇住，個個眼神奇怪。
哇，有人仲堅，爆哥見到一個非洲籍大隻男，一條冷走咗入嚟。佢好似好熟地頭，直接走埋去特價底褲一百六十八蚊五條嘅雜架攤度。爆哥見佢一隻手傾電話，另一隻手就逐條底褲摷來摷去，跟住仙女散花咁逐條掟開。其間有幾個女客人行過，見到有個男人喺度狂摷女人底褲，都打咗個突。而大隻男一邊傾電話一邊話之你，決定兩手齊用愈摷愈興奮，仲不時攞起來慢慢欣賞，大大話話都攞起咗十幾廿條。
埋單時，爆哥同個女職員吹水，佢話唔介意哦，仲話就算係麻甩佬一個人入嚟，都會任佢哋慢慢揀，仲有男人會問店員意見，買咩款式氹老婆好添，但爆哥見呢個大隻男摷到炒栗子咁樣，就覺得好奇怪囉，唔知其他女士又介唔介意呢？

全店都係女人，無端端走個男人入來狂摷特價底褲。

職員指店內所有內衣褲任君選擇，也有男客人問她咩款式較好。

Lily認為高大威猛靚仔選購女裝內褲並無問題，相反，對猥瑣外形的男人就好反感。德國佬帶仔乞錢
最近去尖咀歎杯威士忌，又見到一個奇景，一個德國佬攞住結他自彈自唱，搏途人打賞，佢後面三個「塞豆窿」，好似野孩子咁赤腳周圍走，仲坐喺地下開餐，污糟邋遢，好多途人睇到皺晒眉頭，一個外籍女遊客忍唔住塞咗十蚊俾佢。
搞咩呀，敍利亞人就話走難啫，德國咁好景都要嚟到香港乞食？爆哥忍唔住問個德國佬有冇嘢要幫手，佢解釋話佢籌募旅費先搞成咁啫，原來佢嚟咗香港成個月，住喺青衣酒店，一個禮拜後就要走人，唔夠錢所以出來搏打賞。爆哥覺得呢三個「豆丁」真係慘，細細個就流落街頭搵食，估唔到有父母如此殘忍，冇錢就唔好周圍走啦！